DILI kakumpiyansaan ang impact sa bagyong ‘Auring’ labi na nga wala pa kini maka-landfall sa probinsya sa Sugbo, matod sa Philippine Atmospheric Geophysical and Astronomical Services Administration (Pagasa) -Mactan station.

Matod ni Jhomer Eclarino, weather specialist sa Pagasa-Mactan, nga anaa pa sa kritikal nga kondisyon ang tibuok Central Visayas ug ang tibuok isla sa Sugbo hangtod sa Lunes, Pebrero 22, 2021.

“Actually, daghan pod nangutana ganina ngano wala pa’y uwan. So, sabi nila wala na’y bagyo, but actually wala pa naka-landfall ang bagyo. So, naa pa tay expected nga occasional heavy rains,” sigon Eclarino.

“Makasinati pud ta og mga kusog nga hangin tungod sa bagyong Auring ug sa hangin nga dala sa kusog nga Amihan,” dugang niya.

Delikado gihapon ang maong kondisyon labi ngadto sa mga landslide ug flashflood-prone areas, matod ni Eclarino.

Nakasinati na og moderate ngadto sa heavy nga pag-uwan ang Bohol ug ang Southern Leyte niadtong Dominggo, Pebrero 21.

Sigon ni Eclarino nga base sa ilang labing uwahi nga pagsubay sa bagyo nga mo-landfall si Auring taliwa sa Dinagat Islands, Eastern Samar ug Leyte area karon, Lunes, Pebrero 22. (WBS)