GIKLARO sa Emergency Operations Center (EOC) alang sa Covid-19 sa Dakbayan sa Mandaue nga bisan pa man nga adunay gipatuman nga liquor ban, gitugotan gihapon ang pagpamaligya ug pagtransport niini.

Sa kondisyon nga dili kini i-serve sa establisemento dayon imnon diha sa tindahan.

Matod ni August Lizer Malate, ang pangu sa EOC alang sa Covid-19, nga gitugotan gihapon ang pagbaligya ug pag-transport sa mga ilimnong makahubog.

Kini human nga usa ka dakong kumpanya sa serbesa ang miduol sa kagamhanan og nangayo og mga dokumento ug permit aron sila tugotan sa pagbaligya og pagtransport sa ilang mga produkto.

“Di ba sauna nagtotal liquor ban nga wala gyud pero wala ta diretso didto kay this is to give balance sa economy. Lahi man gyud ang tuyo og tumong ani which is to really avoid public gatherings,” dugang ni Malate.

Sigon niya nga mamahimo makabaligya basta dili lang kini ablihan daan ug dili imnon sa maong tindahan.

Gitugotan usab ang mga kostumer sa pag-inom og ilimnong makahubog sa sulod sa ilang tagsa-tagsa ka balay.

Sa sayo pa, niadtong Pebrer 20, 2021 gipatuman ni Mandaue City Mayor Jonas Cortes og liquor ban diin gibawal ang pagserve ug pag-inom og ilimnong makahubog sa mga bisan unsang mga establishemento.

Sa laing bahin, miingon si Malate nga kinahanglan ang liquor ban tungod namatikdan nila nga adunay mahitabong panagtapok sa mga tindahan nga magsilbi og serbesa.

Gani, miingon si PCol. Si Jonathan Abella city director sa MAndaue City Police Office nga namatikdan usab nila nga bisan nga kadtong igo ra mukaon sulod sa lima ngadto sa 10 ka minutos, magdugay na kini sobra sa tunga sa oras tungod sa gibaligya nga ilimnong makahubog.

Nagpasabot kini nga mas taas sab ang oras nga expose ang kustomer sa virus, sigon ni Abella. (KFD)