GIBASURA sa konseho sa Dakbayan sa Lapu-Lapu ang hangyo ni Mayor Junard “Ahong” Chan nga magbutang og representante sa Konseho ang iyang buhatan nga maminaw ug maniid sa session, apan dili makaapil sa diskusyon.

Motingog lamang kini kon pangutan-on sa Konseho, sumala ni Chan.

Nasagmuyo si Chan sa desisyon sa mayoriya.

Si Atty. Eugene Espedido, city legal officer, , maoy gitudlo unta ni Chan nga iyang respresentante sa Konseho.

Gihimong basehanan ni Chan nga giingong nalatid sa Charter sa dakbayan niadtong 1961 nga ang mayor dunay katungod sa pagbutang og representante sa konseho alang sa mas sayon nga pagpangalagad sa katawhan.

Apan human sa botasyon sa konseho, walo ang wala mouyon sa hangyo sa mayor samtang lima ang pabor.

DI MAHIMO?

Matod ni Konsehal Flaviano “Bobit” Hiyas, kinsa usa sa nibalibad sa hangyo sa mayor, nga ang rason nganong ilang gibasura gumikan kay ubos sa Local Government Code of 1991 nga wala gitugot nga ang buhatan sa mayor isip executive branch nga makaapil sa konseho nga usa ka legislative branch.

Gituyo kini, sumala ni Hiyas, aron adunay lain-laing function ang executive ug legislative branch sa gobyerno.(GCM)