NASUBO si Cebu Archbishop Jose Palma sa mga nahitabong pagpatay sa mga batan-on sa Sugbo ilabi na sa kaso ni Christine Lee Silawan ug ni Tesa Marie Ygay.

Nibutyag si Palma nga gisakitan siya sa linuog nga kamatayon sa duha ka dalaga samtang nangandam sila para sa National Youth Day, usa ka dakong kalihukan para sa mga batan-on sa Sugbo karun umaabot nga Abril 23 hangtud Abril 28.

Sa usa ka press conference pag Biyernes sa buntag, Abril 12, nibutyag si Palma nga usa sa paagi nga mapakgang nga aduna pay mabiktima nga kabataan sa bisan unsa nga kremin mao ang pag- minus kanila sa paggamit sa gadget ug social media, o kinahanglan nga mahimo sila nga responsible nga social media ug gadget user.

Panawagan usab niya sa ubang kabataan, nga unta gamiton ang social media, diha sa ilang pag- encourage, paghatag inspirasyon ug pagtabang sa ubang mga batan-on nga anaa sa kagul-anan ug kalibog diha sa ilangkinabuhi.

“I believe, other youths can contact other young for hopes, inspirations, and statements of support. Will not just lost hope that evil in this world will be flooded away by goodness,” matod pa ni Palma.

Si Silawan, 16 anyos, namatay human gidunggab sa makadaghang higayon ug gipanitan ang nawong sa Sitio Mahayahay sa Barangay Bangkal, siyudad sa Lapu-Lapu, niadtong Marso 10.

Si Renato "Renren" Llanes, 43, nikompisal sa kapulisan karung semanaha nga siya gyud ang nipatay ni Silawan.

Pero sa wala pa nisurrender si Llanes, ang National Bureau of Investigation (NBI) nakasikop ug 18-anyos nga lalaki nga gitumbok nila nga maoy nagpatay ni Silawan.

Samtang si Ygay, 14 anyos, gidunggab ug gilabay sa wala pa mailhing mamuno sa septic tank sa Cogon Cruz Integrated School sa siyudad sa Danao niadtong Abril 7.

Gidudahan sa pulis sa siyudad sa Danao nga si Jessie Medequillo, usa ka security guard, ang nipatay ni Ygay.