LALAKENG nahinanok sa pagkatulog nakamata sa kasakit, apan namatay ra sab human dunggaba sa makadaghan sa iyang silingan mga alas 9 sa Huwebes sa gabii sa Barangay Tubod, lungsod sa Badian.

Si Sabino Dicen Comision, 50, buwag sa asawa, laborer, namatay human nakaangkog daghan mga samad dinunggaban sa liog, buko-buko, dughan ug ubang parte sa kalawasan.

Ang suspek nga giilang si Johnny Suerte Manimtim, 44, minyo, panday, taga Barangay Tubod, Badian, nasikop sa kapulisan alas 11:30 sa buntag Biyernes.

Si Police Staff Sgt. Dennis Sun, imbestigador sa Badian Police Station nga nahinabi sa Superbalita Cebu, nagkanayon nga si Comision natulog dihang gisulong ni Manimtim.

Matod ni Sun nga ilang nasubay si Manimtim base sa mga tinulo sa sugo nga didto naabot sa nataran sa panimalay sa suspek. Nakita sab ang tsinelas nga itom nga nakadugo, ingon man ang pink nga towel nga gitrapo ni Manimtim.

Nagkasungi ang duha mga tulo ka buwan ang nakalabay human pasanginli si Comision nga nanguha og kwarta sa iyaan ni Manimtim. Giingong nasuko si Comision ug si Manimtim mao ang mipalit sa away.

Kon mahubog si Comision giingong mosulong kini sa balay ni Manimtim.

Giingong nibahad pa kini nga iyang patyon si Manimtim.

Si Manimtim niingon nga siya nanagana, iyang giunhan si Comision. Nakuha sa kapulisan ang double blade nga kutsilyo nga gituohang gigamit ni Manimtim.