PATAY ang usa ka panday nga nag-ayo sa atop human aksidenting nakuryentihan alas 5:45 sa hapon sa Biyernes didto sa Barangay Upper Poblacion, lungsod sa Pilar, Isla sa Camotes.

Si Alexander Tanza, 47, dunay kapuyo ug panday sa nahisgutang lugar, namatay dihadiha human nakuryentihan.

Si Police Staff Sgt. Florante Doria sa Pilar Police Station nga nahinabi sa Superbalita Cebu, nagkanayon nga ang biktima nag-ayo sa atop sa ilang silingan.

Gikatahong dunay linya sa kuryente didto sa ibabaw sa atop nga live ug direkta sa poste sa Camotes Electric Cooperative (Celco).

Ang biktima samtang nag-ayo sa atop naghupohupo kini apan aksidenting nasaghid ang iyang tangkugo hinungdan sa pagkakirig patay.

Sumala pa ni Doria nga sa pag-abot sa kapulisan ug sa mga rescuer, patay na ang biktima.

Wala pa masuta sa kapulisan kon kini dunay foul play. (GPL)