Ang exhaust vent kun panghaw nga maoy agianan sa aso kon dunay lutuon ug wala malimpyohi miresulta sa pag-aso sa Lunes sa gabii, Enero 3, 2022.

Ang hitabo girespondihan sa Cebu City Fire Office (CCFO) ug natabang ra, wa makadako ang kayo sa kan-anan sa J. Alcantara St., kanhi P. del Rosario Extension.

Matod ni FO2 Fulbert Navarro, duty investigator sa CCFO, nga nagtipun-og na nga mantika nga walay limpyo limpyo sa exhaust vent maoy hinungdan sa pag ulbo sa aso.

Dugang ni Navarro nga wa nakakatap ang kayo tungod kay natabang ra dayon sa unang miresponde nga fire truck.

Ang kan-anan gipanag-iya ni Edgar Pangue, kinsa gitabang sa mga fire officer kay nawad-an sa panimuot atol sa hitabo.

Ang alarma nadawat sa CCFO alas 10:16 sa Lunes sa gabii.

Ang sunog nga midanyos ra balor og P3,000 tungod kay dali nga naaksiyonan sa kabomberohan.

Si Pangue uban sa iyang mga trabahante nangandam unta sa mga packed meals nga ilang ihatod sa nag order kanila apan napakgang human nga miulbo ang aso sa dirty kitchen.