Polis nga daling nadakop og suspetsadong kawatan gipasidunggan.

Si Patrolman Vince Cabalquinto, nadestino sa Parian Police Station ang nakadawat og pasidungog gikan sa hepe sa Cebu City Police Office, Police Colonel Ireneo Dalogdog, gumikan sa dali nga pagkasikop sa suspek nga nibiktima sa usa ka Swiss national.

Usa ka commendation ang gihatag ngadto kaniya kay nakaresponde siya su’d lang sa upat ka minutos.

Ang biktima giilang si Daniel Heinz Vetter, 56, Swiss national, taga Zurich, Switzerland nga niabang og lawak sa usa ka pension house sa Barangay Kamagayan, Cebu City.

Samtang ang suspek giila nga si Joeton Alfon Decierdo, 40, adunay kapuyo, nga higala usab sa langyaw.

Natingala na lang ang biktima nga nawala ang iyang bag ug nangutana sa mga trabahante sa pension house.

Iyang gitan-aw ang closed circuit television (CCTV) footage ug nakita ang suspek nga maoy mikawat. Nadala niini ang cellphone nga nagkantidad og dul-an sa P10,000.

Mag-atubang og kasong pagpangawat si Decierdo, kinsa nadakpan gilayon ni Cabalquinto sa follow-up operation.