USA ka pintor nga gikan lang nag-attend ug hearing sa korte ang gipusil patay atubangan sa iyang asawa ug apo sa Mantawi Avenue, Barangay Tipolo, dakbayan sa Mandaue kaganihang Huwebes sa hapon, Hulyo 11, 2019.

Giingon naghuwat nalang unta ug masakyan si Teodoro Mejares, 53 anyos, kuyog sa iyang asawa nga si Gina ug ilang 7-anyos nga apo para muuli sa ilang balay sa Barangay Casili, lungsod sa Consolacion sa dihang gikalit lang ni silag duol ug duha ka lalaki nga nagsakay ug usa ka motorsiklo.

Ang backrider giingon nibunot sa iyang armas ug gipusil si Mejares sa makadaghang higayon una pa siya nibalik sa iyang kauban nga naghuwat sa motor.

Patay diha dayon si Mejares samtang daling nakaeskapo ang duha ka suspetsado.

Matod sa asawa ni Mejares nga si Gina nga gikan lang nag-attend ug hearing ang iyang bana sa kasong illegal possession of firearms and ammunition sa Mandaue City Hall of Justice sa wala pa kini gipusil patay.

Dugang ni Gina nga gikasuhan ang iyang bana niadtong tuig 2017 apan nakapyansa ra kini.

Nakakuha ang kapulisan ug lima ka basiyo sa wala pa mailhing kalibre sa pistola.