Nibahad ang kadagkoan sa Philippine National Police sa ilang mga personnel nga likayan ang pag sugal sa online sabong human nasakpan ang laing police nga nagsugal niini pinaagi sa iyang cellphone.

Matod ni Police Lieutenant General Rhodel Sermonia, deputy chief for administration sa PNP, nga daghan na nga mga pulis ang ilang nahibaw-an nga na boang sa online sabong lukop Pilipinas.

Gani, atol sa iyang pag libot sa mga police office sa Metro Manila, aduna siyay nasakpan nga pulis nga sige og tutok sa cellphone niini.

Sa iyang pagsusi, nisugal diay kini sa online sabong.

Tungod niini, iyang gikiha ang maong police personnel sa kasong administratiba nga mahimong ikatangtang niini sa serbisyo.

Si PNP Chief Police General Dionardo Carlos hugot sa iyang pahimangno sa iyang mga sakop nga likayan ang pagsalmot sa bisan unsa nga matang sa sugal.

“Wala po akong eksaktong number pero ako mismo ay naka experience na ang isang police ay nag o-online sabong sa cellular nya nung ako po ay umiikot. Mayroon po akong nakita at pinakasohan ko na, ibig sabihin mag silbing warning po yun sa ating kapulisan, ” matod ni Sermonia.

Mag silbi matod pa kining warning sa tanang pulis nga ang PNP seryuso sa pagsilot niadtong dili mopatuo sa kamandoan nga dili manugal.

Sa miaging buwan, usa ka pulis sa Metro Manila gipasakaan og kaso human masuta nga nakadispalko og kwarta sa buhatan diin siya nadestino ug niprenda sa sakyanan sa iyang kauban.