USA ka Polish national ang nasikop human kini giingon nga nangmolestiya og usa ka 16-anyos nga babaye.

Ang maong menor daw mikuyog sab sa maong langyaw human sila magkasabot apan wala daw kini makahibaw nga menor ang maong babaye.

Ang langyaw naila nga si Janusz Piotr Ciniewski, 31, lumad sa Czestochowa, Poland, kinsa kasamtangan nga nag-abang og lawak sa usa ka building sa Brgy.Kamputhaw, Cebu City.

Nasikop ang maong langyaw human nitawag ang amahan sa 16-anyos ngadto sa kapulisan kay daw nagpakitabang ang iyang anak kay dili daw kini makagawas sa kwarto nga giabangan ni Ciniewski.

Matod sa hepe sa Women and Children’s Protection Desk sa Cebu City Police Office nga si Senior Insp. Sheila Gurteza nga gikatakda nga susihon pa nila karong adlawa og andam pa mopasaka og kaso ang pamilya sa menor batok sa langyaw kabahin sa maong insidente.

Dugang ni Gurteza nga nakit-an ra daw sa langyaw ang maong menor sa dalan nga naglakaw-lakaw ug didto kini niya gipangutana ug gikasabot.

Nipasangil usab sa langyaw nga wala siya mahibaw nga menor pa diay kini.

Gikatakda nga kuhaan sa iyang pamahayag ang menor karong adlawa sa kapulisan.

Samtang, natanggong na karon ang Polish sa Police Station 2.(HBL)