Ang bag-ong Mandaue City Public Market sa Barangay Centro nagbutang og dakong LED screen daplin sa karsada nga nagpakita sa listahan sa presyo sa mga baligya sa merkado alang sa mga konsumidor.

Si Edgar Seno, Mandaue City market administrator, nitug-an sa mga tigbalita niadtong Huwebes, Hunyo 9, nga ilang gi-install ang dakong LED board aron ma-update ang mga konsumidor sa presyo sa mga palaliton matag karon ug unya.

Ang 7x4 square meters nga LED screen nahimutang sa atubangan sa entrada sa merkado nga naa sa daplin sa dalan.

Gipahimutang kini sa unang semana sa Mayo ning tuiga isip kabahin sa rehabilitasyon sa merkado ug kini nagsiga gikan sa alas 6 sa buntag hangtod sa alas 6 sa gabii.

Matud ni Seno nga ilang gi-install ang screen sa dili pa ang entrance aron masusi sa mga tawo ang presyo sa mga baligya sa merkado sa dili pa mosulod.

Ang screen makapaminos sa ilang kalisud sa pagsusi sa mga presyo aron ilang magamit ang ilang budget sa dili pa mosulod sa merkado, pasabot ni Seno.

Ang gipakita nga listahan sa presyo gi-update matag Lunes sa hapon sa market’s pricelist monitoring committee, diin sila nagpahigayon og sinemana nga survey sa mga presyo sa merkado direkta gikan sa mga vendors.

Gi-post usab nila ang updated price list sa social media pinaagi sa ilang Facebook page.

Dugang ni Seno nga ang price list nga gi-post nisunod sa suggested retail price (SRP) nga gi-issue sa Department of Trade and Industry (DTI).

Apan sa panahon sa kakuwang sa suplay ug taas nga panginahanglan, siya miingon nga ang mga vendor mapugos sa pagbutang og dugang nga labing menos P10 ngadto sa P15 sa ibabaw sa SRP tungod kay kadaghanan kanila mamalit sa ubang tinubdan sama sa mga supermarket.

Gawas niini, ang merkado aduna usay 176 ka closed-circuit television (CCTV) camera nga gitaod sa matag eskina aron mamonitor ang kaluwasan ug ordinansa sa sulod.

Ang CCTV footage irekord ug tan-awon sa command center sa merkado, nga makita usab sulod sa bag-ong Mandaue City Public Market.

Ang Mandaue City Public Market gi-renovate niadtong 2014 human gideklarar ni Mandaue Mayor Jonas Cortes nga dili kini luwas nga puy-an human nadaot sa linog niadtong Oktubre 15, 2013.