POLICE Regional Office (PRO) 7 ug Central Command nangandam na sa pagpakatap sa ilang pwersa sa Negros Oriental sa sunod buwan sa pagtuman sa Memorandum Order 32 ni Presidente Rodrigo Duterte gumikan sa kanunay nga pagpangataki sa mga rebelde.

Atol sa Regional Joint Peace and Security Coordinating Center meeting sa PRO 7 uban ang Task Force Cebu nga gilangkoban sa 302nd Brigade Philippine Army, ilang natuki ang pagpakatap na sa mga sundawo ug kapulisan sa probinsya sa Negros Oriental.

Kabahin kini sa giluwatan nga MO 32 ni Presidente Rodrigo Duterte sa tibuok isla sa Negros tungod sa padayon nga pagpangatake sa mga lawless elements sa maong isla nga gipangulohan sa mga sakop sa New Peoples Army.

Matod ni Chief Supt. Debold Sinas, director sa PRO 7, ilang nasabutan unsa nga mga dapit sa Negros Oriental ang angayan nga dugangan sa pwersa gikan sa kapulisan ug sa Armed Forces of the Philippines (AFP).

Sa habig sa PRO-7, ang Special Action Force ang ipadala sa maong probinsya inabagan sa pwersa gikan sa Bohol Provincial Police Office ug sa probinsya sa Sugbo sanglit sila ang labing duol.

Usa sa mga gilikayan sa mga opisyal sa PNP ug mga sundalo ang misencounter. AYB