DILI pa matumbok nga si Jerome Labitad kadtong na engkwentro sa mga sakop sa Provincial Intelligence Branch (PIB), Martes sa buntag Enero 29, nga gituohan nga adunay kalambigitan sa pag ambush kang San Fernando Mayor Lakambini Reluya.

Matod ni Chief Supt. Debold Sinas, Director sa Police Regional Office 7 nga sa pagkakaron, nagpadayon pa ang imbestigasyon batok kang Labitad.

Niadtong Martes, naay ka engkwentro ang kapulisan nga iliang giila nga si Labitad. Sa dihang dakpon na unta nila si Labitad pinasikad sa warrant of arrest nga giluwatan ni Judge Glenda Go sa Regional Trial Court (RTC) Branch 65 sa syudad sa Talisay, nisukol kini kanila matod pa ni Sr. Insp. Alejandro Batobalonos.

Adunay daghang armas nga nakuha ang PIB sa balay ni Labitad sa Barangay Campo 4 syudad sa Talisay nga ipaubos pa sa ballistic examination.

Mimando si General Sinas nga ipa cross match ang mga bala nga nakuha sa crime scene sa pag ambush sa van ni Mayor Reluya kung kini motakdo ba.

Adunay duha ka saksi ang Special Investigation Task Group Reluya nga naka hatag na sa ilang pamahayag ug naka hulagway na sa mga armadong kalalakin-an nga posibling maghatag kanila og lead sa imbestigasyon