ORMOC City, Leyte - Patay ang usa ka aktibong pulis human pusila sa wa mailhing gunman niadtong Sabbado sa alas 8:00 sa gabii, Disyembre 19, sa Barangay Libertad ning dakbayan, pipila ka metros gikan sa iyang panimalay.

Giila ang biktima nga si Police Corporal Ruffy Pepito, 38, kanhi nadestino sa Ormoc City apan toa na sa lungsod sa Silago, Southern Leyte.

Base sa inisyal nga imbestigasyon, nagpalit og ice cream si Pepito dapit sa ilang panimalay sa dihang usa ka itom nga Ford Everest nga sports utility vehicle (SUV) ang mihunong.

Nikanaog ang gunman nga naka camouflage dala ang taas nga kalibre sa armas ug gipamusil sa makadaghan nga higayon si Pepito.

Nisibat paingon sa direksyon sa Salvacion ang sakyanan ug wa hibaw-i ang plate number. Gideklarar sa taga Ormoc City Rescue nga patay na si Pepito.

Padayon nga giimbestigar sa kapulisan ang posibleng rason sa pagpatay sa pulis. (JKDP)