CATBALOGAN CITY, Samar - Patay ang usa ka pulis pagkahuman gipusil sa wa mailhing responsable sud sa iyang panimalay, alas 2 pasado sa kadlawon, Huwebes, Abril 11.

Giila ang pulis nga si Police Staff Sergeant Kirk Walter Lorenzo, sakop sa Catbalogan City Police Station, nagpuyo sa Calachuchi St., Barangay Moñuz, siyudad sa Catbalogan.

Nadawat sa kapulisan ang tawag alas 3 sa kadlawon hinungdan nga ilang gisusi ang lugar. Dakong kakurat sa mga pulis nga ila ra usab kabaro ang biktima.

Base sa imbestigasyon sa kapulisan,gikan nitambong sa alumni homecoming sa Samar State University (SSU) sa Catbalogan ang biktima nianang gabii sa wa pa nahitabo ang pagpusil.

Dugang sa imbestigasyon, posibleng gisundan sa gunman ang pulis pagpauli niini gikan sa aktibidad.

Posibleng hayon ra nga nakasud ang suspek sa balay sa pulis. Sa dihang nipahuway Lorenzo sa sofa bed sa ilang sala, didto gipusil siya sa suspetsado.

Gidala pa kini sa Samar Provincial Hospital apan gideklarar nga dead on arrival. Sa pagsusi, dunay samad pinusilan sa iyang ulo si Lorenzo hinungdan sa iyang kamatayon.

Padayon pa ang imbestigasyon sa insidente samtang nagbangotan ang pamilya ug kaubanan sa biktima.