QUINDAPONDAN, Eastern Samar - Namatay ang usa ka pulis human gipusil sa gituohang mga sakop sa New People’s Army (NPA) sa Barangay Cambella ning lungsod alas 2:25 sa hapon, Sabado, Mayo 18, 2019.

Giila sa Police Regional Office (PRO) 8 ang biktima nga si Patrolman Michael Felipe Ribo, taga Balangiga, Eastern Samar.

Si Ribo usa ka intelligence operative sa Eastern Samar Provincial Mobile Force Company.

Base sa inisyal nga imbestigasyon, konektado ang insidente sa pagpamusil sa Barangay Bagte ning lungsod, diin gidudahan usab nga NPA ang naghimo.

Isip intelligence officer, gitahasan si Ribo sa pagkuha og mga impormasyon.

Apan wa na makabalik sa ilang kampo si Ribo human giatangan sa mga rebelde samtang nanguha kini og impormasyon.

Gipusil sa makadaghang higayon si Ribo nga miresulta sa iyang hinanali nga kamatayon.

Wa dayon makuha ang lawas sa pulis gumikan kay dunay impormasyon nga naa pa sa crime scene ang mga NPA, andam makigpinusilay sa mga pulis nga niresponde.

Nibiya ra sab hinuon sa lugar ang mga rebele una pa nakuha na ang lawas ni Ribo.

Ang Samar usa sa mga dapit sa Kabisay-an nga dunay aktibong naglihok nga mgarebeldeng komunista.

Di kini unang hgayon nga dunay gipatay nga pulis ang mga NPA sa Samar pinaagu sa mga ambush ug pagpanulong sa mga police station.