Usa ka pumpboat nga dunay sakay nga 32 ka mga pasahero ug tulo ka mga tripulante nalunod sa kadagatan sa Barangay Gilutunhan, lungsod sa Cordova, sa Septiyembre 25, 2022.

Si Fred Anlocotan, pangu sa Local Disaster Risk Reduction and Management Office (LDRRMO) sa naasoyng lungsod, nagkanayon nga nigikan sa Barangay Marigondon, dakbayan sa Lapu-Lapu ang maong pumpboat.

Tuyo unta niini nga molawig paingon sa Isla sa Gilutungan ug Nalusuan aron mag island hopping.

Apan ang maong plano napakyas subay sa pagkaguba sa makina sa sakayan.

“Nitirik ang makina sa pumpboat, unya nasudlan og tubig ang ilang pumpboat tungod sa dagko kaayo nga bawod,” asoy ni Anlocotan sa Septiyembre 26, 2022.

Dali hinuon nga naluwas ang tanang mga pasahero ug mga tripulante sa ingon wala usa’y natala nga naangol sa hitabo.

“Nag-coordinate dayon mi sa barangay ug sa Coast Guard aron makapangita og pumpboat nga masakyan sa mga na-rescue,” dugang niini.