MAKAGAWAS na sa tibuok Dominggo ang mga lumolupyo sa Dakbayan sa Sugbo nga dunay quarantine pass bisan unsang orasa, odd o even man.

Usa kini sa bag-ong mga unod sa Executive Order (EO) 94 nga giluwatan ni Mayor Edgardo Labella sa Huwebes, Oktubre 1, 2020.

Nahukman kini sa mayor human iyang naobserbaran nga nagbaton na og disiplina ang mga tawo hinungdan sa pagkunhod sa mga kaso sa coronavirus disease (Covid-19) sa dakbayan.

Ang QP nga adunay tumoy nga numero, 1-3-5-7-9 makagawas sa Lunes, Miyerkules, Biyernes ug Domingggo samtang ang 2-4-6-8 sa Martes, Huwebes, Sabado ug Dominggo.

Sa miaging EO ni Labella niadtong Septiyembre 1 hangtod 30, dihang unang gipaubos sa modified general community quarantine (MGCQ) ang Cebu City, makagawas ang mga lumolupyo sa Dominggo apan gitunga ang oras. Ang odd numbers sa buntag samtang hapon ang even numbers.

Base sa EO 94 ni Labella, padayon gihapon ang stay at home order sa 21 anyos paubos ug 60 anyos pataas.

Ang mandatory nga pagsul-ob sa mask, social distancing ug kanunay nga paghugas sa mga kamot para malikayan ang pagkatap sa Covid-19 naa gihapon.

LIQUOR BAN

Sa samang EO, gilibkas na ni Labella ang liquor ban sa dakbayan sa Sugbo sugod sa Oktubre 1, 2020.

“Hinayhinayan nato og abli kay daghan man tawo gusto mopalit like beer unya naa sad na sa memorandum circular sa Department of Trade and Industry (DTI), kinsa nagtugot para sa inanay nga pagbangon sa atong ekonomiya,” padayag ni Labella.

Ang mga restaurant nga kanhi nagtanyag og beer sa ilang mga kustomer mamahimo nang makabaligya panahon sa ilang business hours.

Kini ang gibutyag ni Public Information Officer Razel Cuizon sanglit ang mga sari-sari store, wine shop o supermarkets naninda na niadtong panahon sa general community quarantine, apan didto gipang-inom sa ilang pinuy-anan.

Apan ang mayor nibutyag nga gidili gihapon ang pag-inom sa pampublikong mga lugar sa dakbayan sama sa kilid sa karsada, park, basketball court ug uban pa.

Ang mga diskohan sama sa mga establisemento nga nahimutang sa Mango Square, pabilin gihapon nga sirado.

ABOGADO APOR

Gitugotan na sab ni Labella ang mga abogado nga makagawas sa ilang pinuy-anan nga way quarantine pass.

Ang mayor nagkanayon nga bisan kon way court hearing ang mga manlalaban, kinahanglan silang mogawas kay di lang sulod sa korte ilang trabaho, mobisita sab sila sa ilang kliyente para sa pagbuhat og pleadings o affidavit.

Ang desisyon nahukman ni Labella human nihangyo kaniya ang Integrated Bar of the Philippines (IBP) Cebu chapter nga tugtan ang mga miyembro nilang mga abogado labi na kadtong way quarantine pass ug ikonsiderar na silang mga authorized person outside residence (Apor).

“Ang mga abogado kaniadto makagawas lang sila kon magpakita sila og notice of hearing. Karon nihangyo ang IBP-Cebu City nga bisan pa kon wa silay hearing basta naa silay IBP ID, tagaan silag higayon nga makagawas,” matod ni Labella.