Subli nga mohangyo si Lapu-Lapu City Mayor Junard Chan ngadto sa Mactan Cebu Bridge Management Board (MCBMB) sa sunod nilang board meeting nga butangan og railings ang Mandaue-Mactan Bridge ug Marcelo Fernan Bridge.

Kini human nga walay hunong ang mga tawo nga mosaka sa duha ka taytayan gumikan kay planong magkutlo sa ilang kinabuhi.

Karon lang buwana, matod sa mayor, duha ka insidente sa suway nga pag-ambak sa taytayan ang napakgang.

Pasabot ni Chan nga adunay mag roving sa taytayan nga mga personnel sa City Traffic Management System (CTMS) unya aduna say pulis sa ilawom nga bahin niini aron dali nga moresponde kung adunay moaksyon ug ambak.

Apan kining maong mga personnel mao ra usab ang bantayan sa adunay dautang tinguha sa taytayan sumala sa mayor hinungdan nga dili gayud kalikayan nga aduna gayuy makatikang o mokatkat ba

kaha sa steel trusses niini.

Ang MCBMB maoy adunay gahom sa pagdesisyon unsa ang angayan ipatuman sa taytayan. Gibutyag ni Chan nga katapusan silang nagkatagbo sa MCBMB tulo ka buwan na ang nakalabay.

“Di man kitay makadecide ana hopefully nga madungog nila ang atoang hangyo nga ang pagbutang sa railings pinabarog siguro nga wala silay way to katkat,” matod ni Chan.

Samtang ang pangulo sa City Disaster Risk Reduction and Management Office (CDRRMO) nibutyag nga ang lalakeng misuway ug ambak sa taytayan niadtong Abril 20 ila na nga gi-turn over sa

kagamhanan sa lungsod sa Lilo-an gumikan kay nagtrabaho ug nag-estar man kini sa Tayud.

Ila na usab nga nahinabi ang asawa niini ug nasuta nga aduna gayud silay problema sa magtiayon. “Ang iya asawa naestorya nato sa Saudi dunay serious case on physical abuse dunay sa serious family problem that needs to be investigated further by Lilo-an (police),” pasabot ni Bañacia. (GCM)