Pormal nang nanumpa si Cebu City Acting Mayor Michael Rama ug City Councilor Donaldo “Dondon” Hontiveros isip hingpit nga mayor ug bise mayor sa Sabado sa buntag, Nobiyembre 20, 2021.

Ang duha pormal nga nanumpa sa katungdanan usa lang ka adlaw human nitaliwan si Mayor Edgardo Labella.

Si Court of Appeals (CA) Cebu Associate Justice Gabriel Ingles maoy nidumala sa pagpapanumpa ni Rama sa katungdanan.

Human sa iyang pagpanumpa sa katungdanan, si Rama nipapanumpa usab kang Hontiveros.

Ang asawa ni Rama nga si Malou, iyang mga anak nga sila si Mikel ug MJ ug mga igsuon ningtambong. Anaa usab ang pamilya ni Hontiveros atol sa iyang oath-taking.

Sa usa ka press conference, gipasabot ni Rama nga sila ni Hontiveros kinahanglang mabutang dayon isip mayor ug bise mayor aron malikayan ang “hiatus” sa mga serbisyo sa kagamhanan sa dakbayan.

Si Rama niingon nga dili siya gustong modala dayon sa ryenda sa siyudad human namatay si Labella.

“This is not the way I would wish to become a regular mayor. I just came from where my partner was being laid and talked with him with the city administrator Jun Casas before coming here. Telling him “Edgardo, this is not the way I wish to take the rein of the city government,” pasabot ni Rama, nga nihinumdom sa iyang pagduaw sa haya ni Labella sa Biyernes, Nobiyembre 19.

Karon nga hingpit na siyang mayor, si Rama niingon nga gusto niyang tutukan ang pagpadayon sa mga plano ni Labella ug pagseguro nga dili na mabalda ang serbisyo sa City Hall.