KARONG Huwebes, Nobiyembre 22, ngadto sa Sabado, Nobiyembre 24, ipahigayon na ang International River Summit (IRS).

Isip kabahin sa maong kalihukan, niadtong Biyernes, Nobyembre 16, gisubhan na ang Butuanon River viewing deck nga kabahin sa Mangrove Eco Park, nga gikatakdang mamahimong usa unya sa mga tourist destination sa Dakbayan sa Mandaue.

Insakto ang pagkahuman sa P2 milyones nga viewing deck alang na sa himuon nga IRS.

Dungan usab niini ang paglusad sa pagtanum sa mga pananom nga maka-absorb og toxic nga anaa sa tubig sa sapa.

Nangulo sa paglusad si Mandaue City Mayor Luigi Quisumbing, Bise Mayor Carlo Fortuna ug pribadong sektor, mga kompaniya nga nitabang alang sa kahingpitan sa Mangrove Eco Park ug pagsalbar sa Butuanon River.

Kini sama sa Vicsal Foundation, Matimco Inc., ug uban pa pinanguluhan ni Steve Go, pangulo sa Mandaue City Chamber of Commerce and Industry.

Ang maong mga kompaniya nisaad nga motabang ug paninglan sa kon unsa pay dangatan sa Butuanon River.

Una na gitug-an ni Quisumbing ug Fortuna nga ang viewing deck kabahin sa unang hugna sa 17 ka ektaryang Mangrove Eco Park.

Diin aron makita ang mga paglambo gikan sa grabeng kahugaw kaniadto sa dakung sapa sa syudad ngadto na sa pagkabalik sa orihinal niini nga kalimpyo gikan sa nagkadaiyang polusyon.

Nahimo usab kining kabahin sa rehabilitasyon sa pilot area sa Butuanon River sa Barangay Alang-Alang, Ibabao-Estancia ug Paknaan.

Giangkon ni Fortuna nga gawas sa imprastraktura, hagit alang kanila ang uban sa 61 ka mga kompaniya ug ang indibidwal nga nakapalibot sa Butuanon river sa pagsunod sa insaktong paghipos sa basura, aron wa’ nay polusyon nga molahus sa kasapaan hangtud na sa kadagatan.