ANAA na sa Sugbo kining Pre-exposure Prophylaxis (PrEP) nga proteksyon sa mga tawo nga way human immuno deficiency virus (HIV) apan taas ang risgo nga makatakdan.

Sa pagkakaron, tulo ka mga treatment facilities ang nagtanyag niini sa Sugbo, diin anaa palang sa 30 ka mga tawo nipahimulos sukad kini niabot sa Sugbo niadtong 2018.

Matod ni Francis Baring, nurse II sa DOH 7 nga World Health Organization (WHO) recommended kining PrEP, diin daghan na usab ang mga nasod nga nagtanyag.

Dugang niya nga anaa sa 94-99% ang ka-epektibo niini hilabi na kon himuon na usab kining maintenance sa usa ka tawo nga taas ang risky behavior sa sex.

Anaa sa P1,800-P1,900 ang bayad sa mokuha, lakip na sa baseline laboratory.

Lakip sa package ang usa ka botelya sa tambal nga anaa’y 30 ka tambal alang sa usa ka buwan.

Lakip sa nagtanyag niini mao ang Visayan Community Medical Center treatment hub nga Malingkawasnon, LINK2CARE, ug ang LoveYourself White House. (HBL)