SA pagbukas pagbalik sa scuba diving sa Lungsod sa Oslob, Lalawigan sa Sugbo niadtong Oktubre 27, 2021 nangandam ang ahensiya sa turismo, kagamhan sa Probinsiya sa Sugbo ug ubang stakeholders pinaagi sa pagpahigayon og underwater and coastal clean-up nga ‘Scubalik sa Oslob.’

Gawas sa regular nga pagpanglimpyo sa kadagatagan sa Oslob ilabi na sa adlawng Miyerkules adunay linaing underwater ug coastal clean-up ang ipahigayon nga salmutan sa volunteers gikan sa Philippine National Police (Marine and Tourist Police), Philippine Coast Guard, Bantay Dagat, Barangay Oslob Fisherman Association (BOFA) nga gisuportahan sab sa management sa Bluewater Sumilon.

Gibanabana nga 400 ka kilo sa basura ang nakolekta atol sa ‘Scubalik sa Oslob.’

Sa sayo pa, ang kalihokang turismo sa maong dapit ang kasamtangang gituk-upan atol sa pagsulbong sa Covid-19 .

Tungod sa inanay ang pag-ubos sa kaso sa Covid, nahukman sa kagamhanan nga buhion pagbalik ang turismo.

Ang Oslob naila sa whale shark watching, sandbar sa Sumilon Island lakip na sa marine sanctuary niini. (FVQ)