USA ka security guard gipasanginlang nilugos sa usa dalaga sa alas 4:00 sa kadlawon, Huwebes, Abril 7, sa Barangay Basak, lungsod sa Badian.

Ang biktiman usa ka 22 nga estudyante, taga Brgy. Talayong, Badian.

Ang suspek nga nasikop sa kapulisan giilang si Ryan Dacillo, hingkod, ulitawo,taga Brgy. Basak, Badian, habagatang Sugbo.

Si Police Lt. Etelberto Timagos, hepe sa Badian Police Station nga nahinabi sa Superbalita Cebu, nagkanayon nga ang biktima uban sa amahan nangayo og abag sa ilang buhatan sa Huwebes sa alas 8:00 sa gabii.

Ang biktima nibutyag nga naglakaw siya padulong mopauli sa ilang balay apan ang suspek gikatahong nitanyag nga siyay mohatud sa biktima kay naluoy siya.

Pero dihang nisakay ang biktima sa motorsiklo ni Dacillo, wala kini milahos sa ilang barangay.

Giliko siya sa kalibunan, kakahuyan, ug gidala sa usa ka ka payag.

Walay nahimo ang biktima, siya gipahimuslan sa suspek.

Ang biktima gipahiling na sa Pink room sa Vicente Sotto Memorial Medical Center (VSMMC0.

“Kining biktima naa daw ni siyay depression, kalit kalit nga motukar mao nilakaw pagka-kaadlawon,” dugang ni Timagos

Usa sa mga silingan ni Dacillo nibutyag nga niagi ang biktima ug iya untang ihatod sa ilang balay, apan ang suspek namugos nga siya na lang ang mohatod niini.

Sa hot pursuit sa kapulisan, ilang nadakpan si Dacillo dihang nikanaug sa bus gikan sa Dakbayan sa Sugbo.