GIPANGANDAMAN sa kapulisan ug traffic enforcers tungod sa gipanglantawan nga dagsaon sa daghang mga tawo ang pagsugod sa mga kalihukan sa nagsingabot nga kapistahan sa siyudad sa Talisay.

Ang inasal park night market uban na ang nagkadaiya nga mga kada gabii nga kalihukan ang ilusad karong Sabado, Oktubre 5, nga himuon sa Talisay City Hall grounds.

Karong Sabado mao na usab ang opening salvo sa tanang cultural ug religious nga kalihukan.

Sugdan kini sa konsyerto sa naila nga bisrock band, ang Missing Felimon.

Gitug-an ni Jonathan Tumulak, pangulo sa City of Talisay Traffic Operations Development Authority (CT-TODA), nga sugod karong Sabado, hangtud na sa Oktubre 15, adlaw sa kapistahan ni Sta. Teresa de Avila, gikanselar na nila ang mga day-off sa ilang mga kawani.

Doblehon ang regular nga nga pagpatrolya sa kapulisan, ilabi na sa mga lugar nga dagsaon og mga bisita.

Kini sama nalang sa Talisay City hall gorunds ug sa barangay Poblacion, diin nahimutang ang simbahan.

Gitug-an usab ni Mikki Aznar nga modagsa ang mga tawo sa cultural activities.

Adunay himuong mga pasundayag usab sa sports complex sa barangay Poblacion, ug sa unang higayon, tibuok pagpaabot sa fiesta, kada gabii adunay kalihukan sa Talisay City hall grounds.

Dili lang lechon ang makita, kundi anaa usab ang mga pagkaong barbeque, mga utanon, seafoods, ug mga prutas.

Samtang lingawon ang mga Talisaynon ug mga bisita, sa mga pasundayag sa Tigi sa Tingog sa Talisaynon.

Ang night market magsugod sa alas 5 sa hapon hangtud sa alas 12 sa tungang gabii. (FMD)