Si Senador Imee Marcos, igsuon ni Presidente Ferdinand “Bongbong” Marcos Jr., positibo sa Sars-CoV-2, nga hinungdan sa coronavirus disease 2019 (Covid-19).

Kini ang gipahibalo ni Senate President Juan Miguel Zubiri kagahapon, Agusto 8, 2022, human ang senadora nakasinati og “raging fever” atol sa virtual plenary session.

Kahinumdoman, si Sen. Marcos dinhi sa Sugbo niadtong Sabado, Agusto 6, 2022, atol sa premier showing sa ‘Maid in Malacañang” ug nakahinabi sa mga sakop sa lokal nga media atol sa press conference.

Niadtong Miyerkules, Agusto 3, si Senador Alan Peter Cayetano wala nakatambong sa plenary session human nagpositibo sa coronavirus sa antigen test.

Samtang, ang Department of Health (DOH) nagkanayon nga gikan sa Agusto 1 ngadto sa 7, dunay 27,331 ka bag-ong Covid-19 cases ang natala, nihatod sa daily average cases ngadto sa 3,904, diin 13 percent higher sa kaso sa Hulyo 25 ngadto sa Hulyo 31.

Ang nasod dunay 37,805 ka active Covid-19 cases.

Sumala sa DOH, dunay 76 ka bag-ong kritikal ug severe cases panahon sa Agusto 1-7 period, diin nihatod sa total cases na 772. (RRM, SunStar Philippines)