Aron mas modaghan pa ang senior citizens sa Dakbayan sa Lapu-Lapu nga magpabakuna, nagplano ang local government unit (LGU) sa paghakot sa senior citizens sa matag barangay padulong sa vaccination sites.

Gibutyag ni Grace Mary Carungay, city epidemiological and surveillance unit officer sa Kagamhanan sa Dakbayan sa Lapu-Lapu, nga gamay ra ang mga senior citizen nga nagpabakuna bisan sa subsob nilang pahibawo sa publiko kalabot niini.

Ang mga rason nga posibleng nakaingon, sumala pa ni Carungay, mao ang way kasakyan sa mga senior citizen paingon sa vaccination site.

Laing rason mao usab ang kakapoy sa pag-adto hilabi na kon magsakaysakay pa ug pampublikong transportasyon samtang aduna usay uban nga wa makatoltol sa vaccination site.

Atol sa pagbalik sa pagpamakuna sa mga senior citizens sa dakbayan niadtong Mayo 4, moabot lang sa 268 ang nagpabakuna sa tulo ka vaccination sites sa dakbayan nga mao ang Gun-ob Elementary School, Brgy Agus gymnasium ug Sta. Rosa Hospital sa isla sa Olango.

Sa maong gidaghanon, 195 ang nagpabakuna sa Gun-ob, 69 sa Agus ug upat lang sa Sta Rosa. (GCM)