DI TIAW ang giingong kahadlok sa usa ka maestro human siya giingong gihulga sa masahista nga ipakatap sa internet ang ilang sex video.

Gipasanginlan niya ang 31-anyos nga masahistang si Angel (di tinuod nga ngan) nga nisuway pagpangilkil kaniya og kwarta.

Si Bern (di tinuod niyang ngan), 39, magtutudlo sa usa ka tunghaan sa Dakbayan sa Toledo, nidangop sa kapulisan human siya giingong hulgaa ni Angel, taga lungsod sa Balamban.

Si Angel giingong nidemanda og P4,000 nga bayad bugti sa di pagpakatap sa video.

Nilanat og usa ka simana ang ilang kumunikasyon alang sa sabot-sabot hangtod nga nagkauyon.

Si Police Lt. Col. Janette Rafter, hepe sa Toledo Police Station nga nahinabi sa Superbalita Cebu, nibutyag nga niadtong alas 5:30 sa hapon Martes, Agusto 20, ilang nasikop si Angel pinaagi sa entrapment operation sulod sa usa ka mall sa Brgy. Sangi, Dakbayan sa Toledo.

Si Bern nangayog abag nila human sa pagpunay og text ni Angel, kinsa nidemanda og P4,000 aron isibog ang iyang reklamo ingon man dili ipakatap ang ilang sex video.

Matod ni Rafter nga ilang giubanan si Bern sa mall alang sa entrapment operation ug nadakpan si Angel.

Nakuha ang kwarta ingon man ang selpon nga gigamit niini sa ilang transaction.

Sa Huwebes sa hapon, Agusto 22, gidala si Angel sa piskaliya alang sa pagpasaka sa kasong robbery extortion.

Ang masahista nibutyag nga duna siyay gitago nga kopya sa “dili maayong gibuhat sa maestro” dihang natigayon ang “extra service."

Si Angel nanghimakak nga siya nang-extort sa maestro apan kini maoy nagsigeg haylo kaniya nga magsabot lang sila kabahin sa maong isyu ug magkita sa usa ka mall.

“Ang babaye mitug-an man nga naa niya ang sex video gitipigan, ako siyang gitambagan nga gamiton kini batok sa maestro kun mosang-at gyud siyag reklamo,” dugang ni Rafter. (GPL)