“IS THIS a boycott?”

Mao ni ang pangutana ni Cebu City Vice Mayor Michael Rama atol sa session sa City Council sa Miyerkules, Disyembre 18, human masayod nga way bisan usa gikan sa Sinulog Foundation Inc. ang nitambong.

Sa ikaduhang higayon, ang SFI officials giimbetar sa pagtambong sa session aron ipresentar ang mga gahinan alang sa P35 million financial aid sa Siyudad ngadto sa SFI alang sa pagpahigayon sa Sinulog 2020.

Ang P35 million gastuhon alang sa prizes ug subsidy alang sa contingents. Ang SFI officials mopasabot unta sa Konseho sa mga detalye sa budget alang sa Sinulog atol sa session sa Disyembre 11.

Si SFI executive director Elmer “Jojo” Labella wa makapresentar, hinuon, kay si Rama nikwestyon kaniya sa organizational structure sa foundation.

Nangutana si Rama kon nganong dunay daghang mga ngan sa chart, nga naglakip sa iyang ngan nga unta di na man siya ang SFI chairman. Sa mga ngan nga naa sa chat, ang ngan lang ni Rama ang gikinamot sa pagsuwat sa kopya nga giduso sa SFI ngadto sa Konseho. (JJL)