SECURITY guard wa makatiwas sa pagtubag sa sugo sa iyang lawas human naunay sa service firearm alas 5:30 sa buntag sa Lunes, Oktubre 5, 2020 sa Curva National High School sa Barangay Curva, lungsod sa Medellin, amihanang Sugbo.

Si Paquito Esacala, 58, minyo, taga Brgy. Tinubdan, lungsod Daanbantayan, sakop sa Sikatuna Investigations Security Detective and Allied Services, samdan sa wala nga bagtak.

Si Police Executive Master Sergeant Mamerto Gastador, imbestigador sa Medellin Police Station nga nahinabi sa Superbalita Cebu, nagkanayon nga si Esacala nibutyag nga naglain ang iyang tiyan hinungdan nga nagdali-dali siya sa pagtubag sa sugo sa lawas.

Apan wa na siya makatiwas kay kalit nga mibuto ang iyang service firearm nga .38 caliber revolver nga dunay upat ka mga bala. Igo ra niagi ang bala duol sa iyang kinatawo dayon nilahos sa iyang bagtak.

Si Esacala gidali sa pagdala sa iyang kauban sa tambalanan ug luwas na. Ang armas gi-turnover sa kapulisan sa usa ka Melvin Yuson, guard inspector. (GPL)