ALANG sa pagbukas og balik sa Cebu South Bus Terminal (CSBT), giandam na sa mga opisyal ang terminal aron masiguro nga luwas sa bisan unsa nga sakit, ilabi na sa coronavirus disease (Covid-19), ang mga pasahero.

Si Carmen Quijano, manager sa CSBT, nibutyag nga kon tugotan na gani ang pag operate pag-usab sa terminal, hugot nga ipatuman niini ang no facemask, no face shield ug no passenger’s pass, no entry.

“Oo i-implementar gyud na nato. Dili ka makasulod og wala ka mag face shield, mag mask unya passenger pass, physical distancing pa,” matod ni Quijano.

Kini pagsiguro nga nahisubay gihapon sa standard health protocol ang mga polisiya sa terminal.

Kon kaniadto moabot sa 1,000 ngadto na sa 2,000 ang molingkod sa mga lingkuranan sa waiting area, karon ila nang limitahan sa 500 nga kapasidad ang mosulod sa terminal aron makapahigayon og physical distancing ang mga pasahero.

“Naghuwat pa man ta sa mando sa gobernador. Pero ang kanang mga bangko amo na nga gi-prepare. Ang problema man gud nato dinhi kay ang kanang sa waiting area sa mga passenger ug ang waiting area at the back, mosulod gyud na og mga 1,000. If ever mo start na ta sa operation, ang social distancing is very important unya ang masud na lang ana 500 nalang gyud kay di naman ta makapasulod sa tanan,” dugang ni Quijano.

“Ang problema ana kon anha na sa gawas maglinya, awhagon lang nato, magdala og payong kay dili man gyud na mahimo nga ang tanan manulod kay arong passenger waiting area di naman ta kapasulod,” matod niya.

Hinuon, wa pay petsa kon kanus-a mobalik ang operasyon sa terminal tungod kay di pa tugtan ang dakbayan sa Sugbo pagpabiyahe sa mga public utility vehicles (PUV) sa kadalanan.

Ang CSBT mao ang terminal alang sa mga bus nga mobyahe paingon sa habagatan nga bahin sa Sugbo.

Sa wa pa ang Covid, sagad mosakay sa maong mga bus ang mga taga probinsya nga nagtrabaho sa dakbayan sa Sugbo lakip na ang mga tinun-an.

Sa pagkakaron, ang terminal anaa gihapon gipahimutang sa may Cebu South Coastal Road (CSCR).