GIANUNSYO sa Philippine Charity Sweepstakes Office (PCSO) sa Martes, Septiyembre 29, 2020 nga mobalik na og operate ang Small Town Lottery (STL) karong Oktubre 1.

Matod sa PCSO nga pasabot niini kadtong mga STL nga gipadagan sa Small Town Lottery Authorized Agent Corporations (STL AACs) nga nag-operate sa wa pa gisuspenso ang operasyon tungod sa coronavirus disease (Covid-19) pandemic, mamahimo nang makapangabli og balik.

Aron maka-operate og balik, gikinahalang sertipikado sa Branch Operations Sector and Accounting and Budget Department nga way kuwang sa cash bond ang STL AACs.

Gikinahanglan usab nga nasusi na ug naendorso sa branch operations sector ang ipatuman nga health and safety protocol sa mga outlet.

Lakip usab sa mga rekisitos mao ang pirmadong deed of undertaking sa STL AACs gikan sa PCSO legal department alang sa pagbalik sa operasyon subay sa adjusted remittance scheme nga aprubado sa Office of the President.

Gisuspenso sa PCSO ang operasyon sa lotto ug STL niadtong Marso tungod sa hulga sa Covid-19.

Ang STL usa ka grassroots-based lottery ug charity nga adunay tulo ka mga duwa nga mao ang Pares, Swer2, ug Swer3.

Ang Pares usa ka numbers game diin gikinahanglan mopili og duha ka numero gikan 1 hangtod 40.

Ang Swer3 gikinahanglan mopili og tulo ka mga numero gikan 0 hangtod 9, susama og paagi sa 3D Lotto. Samtang ang Swer2, duha ka numero gikan 0 hangtod 9 ang kinahanglan pilion.

Aron makadaog sa maong mga duwa, kinahanglang pareha ang napiling numero sa nigawas sa draw.

Ubos sa STL charity fund sharing scheme, 10 porsyento sa kita niini mapunta sa lokal nga kagamhanan sa dakbayan o munisipalidad, 5 porsyento sa provincial government, 2.5 porsyento sa congressional district, ug 5 porsyento sa Philippine National Police. Samtang, 7.5 porsyento ang mapunta sa PCSO.