MAKASINATI og laing pag-uwan ang Sugbo karong adlawa, Martes, Marso 19, subay na usab sa traft o extension sa bagyong Chedeng.

Hinay ngadto sa kasarangan nga pag-uwan ang masinati sa tibuok Kabisay-an karon diin gikatakda usab nga molandfall ang maong bagyo sa Davao Oriental karong buntag.

Matod ni Jhomer Eclarino, weather forecaster sa Pagasa Mactan nga mobalik ra usab sa low pressure area (LPA) ang maong bagyo ineg ka Miyerkules.

Ug gikatakda nga magawas kini sa Philippine Area of Responsibility karong semanaha.

Tibuok adlaw nga masinati ang uwan apan katag kini o dili sunod-sunod nga pag-uwan.

Niadtong Dominggo, Marso 17, nasinati usab ang pag-uwan sa buntag diin natala ang 4.1 millimeters nga uwan.

Matod ni Eclarino nga 63.4mm ang uwan nga normal alang sa buwan sa Marso.

Localized nga uwan ang rason sa maong pag-uwan niadtong Dominggo.

Mobalik ra usab ang init nga panahon sa Miyerkules, Marso 20.

Nakasinati karon og El Niño phenomenon ang nasod hinungdan nga wala kaayo’y uwan hangtod mahuman ang summer period ning tuiga.

Gikompirmar usab ni Pagasa Visayas officer-in-charge Engr. Al Quiblat nga posibleng sa uwahing semana sa buwan sa Marso ideklarar ang onset sa summer season.

Gikataho nga bisan sa pagsulod sa bagyo, ang uwan nga dala niini dili makatapak sa dakong kuwang sa supply sa tubig mugna sa kainit.