NAHIMO siyang drayber ug konduktor sa PUJ ug habalhabal.

Apan tungod sa iyang pasensiya, kakugi ug pakigbisog batok sa mga pagsuway, iyang nakab-ot ang tam-is nga kalampusan nga wa niya damhang moabot sa iyang kinabuhi.

Si Israel Alin, 36, usa ka Customs broker, wa magdahom nga mahimo siyang milyonaryo ug manag-iya og mga kompaniya.

Si Israel, kinsa naminyo kang Rosevil Ann Egpit ug natawo ug nagtubo sa Barangay Garing, lungsod sa Consolacion, maoy tag-iya sa Alin Group of Companies.

Ang kompaniya maoy nanag-iya sa Alin Brokerage, Alin Logistics ug Alin Cargo Express.

Ang magtiayong Israel ug Rosevil Ann gikasal niadtog Agusto 30, 2008. Duna silay upat ka mga anak. Si Israel gradwado sa kursong Bachelor of Science in Customs Administration sa University of the Visayas (UV) niadtong 2004.

Sa samang tuig, siya nakapasar sa exam pagka broker nga gikalipay og maayo sa iyang mga ginikanan nga sila si Iluminado ug Suzette Alin.

Kalbaryo

Sa wa pa napabarog ni Israel ang multi-million niya nga negusyo, iya unang giagian ang mga pagsuway.

Gikuha siya sa UV isip part-time instructor para sa BSCA ug samtang magtudlo siya sa hapon, mangita siya og kliyente para siya maoy mo-broker nianang pagka buntag.

Gikan sa 2005, nagtudlo siya sa UV apan, menos gihapon ang iyang income kay ang teaching ray iyang gisaligan.

Niadtong 2007, nakahukom siyang mohunong pagtudlo para makatutok sa iyang pagka-full time broker.

Apan wa gihapoy mga exporter o importer nga iyang nakumbinse gumikan sa iyang kabatan-on, gawas nga aduna nay daghan dagko nga Customs brokerage sa Cebu.

Gumikan kay wa gihapon siyay kliyente ug wa nasad siya nagtudlo, ni-drive siya og PUJ sanglit aduna na siyay driver’s license kay dihang college pa siya, nag-conductor usab siya sa jeep nga nagbiyahian gikan sa Consolacion paingon sa Foodland.

Usahay mamasahero usab siya pinaagi sa habalhabal.

Niabot ang 2009, aduna siyay nahimamat nga usa ka exporter og scrap gikan Mindanao, kinsa nangita og broker.

Kini maoy iyang unang kliyente. Didto pa siya nag-opisina sa luna sa iyang kliyente nga hangtod karon siya gihapon ang broker.

Kay lagi hinay pa ang negusyo sa iyang kliyente, di gihapon paigo ang iyang kita kay kinahanglan na usab siyang mosuporta sa iyang ginikanan.

Padayon siya nga nag-drive og PUJ.

Adunay higayon nga samtang siya mag-drive, nagdala siya og typewriter kay adunay higayon manawag ang iyang kliyente nga adunay i-process para sa container van.

Midaku

Gikan sa usa, nahimong duha ngadto sa tulo ug nanaghan pa ang iyang mga kliyente.

Karon, ang Alin Brokerage maoy usa sa labing dako nga brokerage firm sa Sugbo, kansang opisina nahimutang sa Barangay Tipolo, Mandaue City.

Unsay sekreto sa pagdako sa iyang negusyo? Word of mouth ra gikan sa nag-unang kliyente.

“I started really from nothing and not even in my wildest dream, wa ko magtuo nga ang Alin kaniadto nga way kliyente sulod sa upat ka tuig, mahimo nang pangulo sa mga broker sa Cebu,” paghulagway ni Alin.

Gumikan sa pagdako sa iyang negusyo, karon aduna na siyay Alin Brokerage sa Cagayan De Oro City ug Metro Manila aron pag-atiman sa panginahanglan sa iyang clients kinsa ni-expand usab sa ilang patigayon.

Mipalapad

Niadtong 2013, nisugod siya sa Alin Logistics diin nipalit siya og prime mover ug trailer para siya na maoy mokarga sa container vans.

Maayo ang dagan sa iyang trucking business ug karon lang tuiga, iyang napabarog ang Alin Cargo Express para maoy mohatod sa mga balikbayan box sa overseas Filipino workers (OFW).

Karon, aduna na siyay branch sa Hong Kong, Thailand ug Cambodia diin siya mohatod bisan asa sa suok sa Pilipinas ug “send one, take one” pa ang iyang gitanyag sa mga OFW.

Sunod tuig, nagplano siya nga motukod og branch sa United States of America ug Japan para pagserbisyo sa daghang mga OFW.

Gipasidunggan

Niadtong June 20, gipasidunggan si Alin isip Most Outstanding Customs Broker sa Philippine Regulation Commission gikan sa kapin 7, 000 ka mga broker.