NADAKPAN sa mga sakop Mabolo police station ang usa ka 26 anyos nga construction worker nga giingong human gitulis, gilugos pa gyud ang usa ka 14 anyos nga tindera sa usa ka tindahan sa Barangay Lahug, dakbayan sa Sugbo.

Nahitabo ang pagpanulis niadtong Huwebes, Marso 7, sa sayong buntag samtang nanilhig ang biktima gawas sa tindahan.

Apan pag-abot sa suspek nga si Fraem Fructoso, taga Sitio Tangelo, Barangay Busay, syudad sa Sugbo, nagpatuo kini nga mopalit sa tindahan apan sa iyang pagsulod, kalit lang nga gisirad-an sa suspek ang pultahan ug nideklarar og tulis.

Nakuhaan pa og video sa CCTV ang nahitabong pagpanulis.

Human manulis, gibitad ang biktima sa luyo sa ilang tindahan ug gibundakan og bato ang ulo niini nga maoy nakaingun nga nawad-an siyag kusog ug didto na siya gi lugos sa suspek.

Human sa tulis ug lugos, dali nga nisibat si Fructoso apan wala siya magtuo nga mailhan siya sa mga pulis sa Mabolo.

Sa gihimong follow-up operation pinaagi usab sa pag-abag sa asawa sa suspek, gitudloan sila kon asa nagtago ang iyang bana nga didto ra nisibat sa Barangay Ilihan, lungsod sa Tabogon.

Kasong robbery ug rape ang ipasaka sa kapulisan sa suspek nga naa na karon sa kustodiya sa Mabolo police station.

Matod ni Chief Insp. Dindo Alaras, hepe sa Mabolo police station, nga tiggamitan sa ilegal nga drugas ang suspek.