ANAA sa maayong pang huna-huna ang self-confessed killer ni Christine Lee Silawan nga si Renato Llenes atol sa gihimong psychological examination sa Center for Behavioral Sciences sa Vicente Sotto Memorial Medical Center (VSMMC).

Si Dr. Rene Obra, ang hepe sa CBS-VSMMC, maoy ni-interview ni Llenes sulod sa duha ka orasa isip kabahin sa ilang pag-hiling sa pangutok niini.

Matod ni Obra nga nakahatag og blow-by-blow account si Llenes lakip na sa iyang paghimo sa fictitious Facebook accounts niini sama sa CJ Diaz nga maoy iyang gigamit sa pag pakig- communicate kang Silawan.

Hangtod sa ilang panagkita sa simbahan sa Barangay Pajac sa siyudad sa Lapu-Lapu diin didto nagsugod ang krimen.

Mitug-an matod pa kini kaniya nga sukad sa nag edad pa si Llenes sa 13-anyos nakagamit na siyag illegal nga drugas sama sa pag hingus sa rugby.

Pag edad niya og 18-anyos nagsugod na siyag hit- hit og shabu hangtod sa naabot siyag 39-anyos nga namaligya na siya niini.

Sa wala pa sila magkita ni Christine, migamit pa siyag shabu nianang buntag sa Marso 10 ug wala na siya masayod sa iyang gibuhat sa dihang nagkaaway na sila sa dalagita hangtod nga iya kining napatay gamit ang gunting.

Ang naka pakurat ni Obra sa dihang misaysay kini nga nakonsensya siya sa iyang gihimo ug tungod niini iyang giangkon sa mga police ang tanan.

Sa dihang pagmatuod nga si Llenes ug si Cj Diaz usa ra, nagpatabang matod pa siya sa kalag ni Silawan nga ma abli niini ang account ni Diaz.

“Maka (hair-rising) kay naa siyay gisulti nagpatabang kuno siya sa kalag ni Christine para ma open kuno iyahang account ni Cj Diaz iyahang fictitious nga account kay di man gyud ma open.

Ang uban account eventually na open nila,” matod ni Obra.

Tungod sa mga pamahayag ni Llenes wala siyay nakitang sinyales nga aduna kini sakit sa iyang pangisip apan dili nila mahibaw-an kung namakak kini sa iyang gipang tabi ngadto kaniya.

Dili usab sila maka siguro nga bisan niangkon siya sa tanan sa pagpatay sa 16 anyos nga si Christine Lee Silawan nga tinuod kining tanan.

“Gi-examine namo siya physically and mentally fit gyud siya wala mi ka-elicit ug any morbid psychiatric ingon ta or cognitive dysfunction makaingon ko nga ang pag admitar dili na siya ingon 100 percent evidence nga siya gyud based sa other reasons mao lagi na among estorya dinhi we cannot rule out the possibility of some material gains," dugang ni Obra.

Nagtuo si Obra nga giplanohan na ni Llenes ang krimen nga maoy hinungdan nga nagdala na kinig mahait nga hinagiban aron gamiton sa pag patay sa biktima.

Tungod sa nakita na obserbahan ni Obra, irekomendar na niini nga mahi na siya nga maka barog sa korte alang sa pagtaral sa kaso.

“During the time of examination last Saturday and Monday kani si Llenes is physically and mentally fit to stand for trial,” dugang ni Obra.

Nabantayan usab sa mga staff ni Obra nga walay indikasyon nga namakak si Llenes.

Giangkon ni Obra nga apil sa ilang gitun-an ang kinaiya sa usa ka tawo kung nag-sulti ba kini sa tinuod o namakak lang apan sa ilang pag tan-aw kang Llenes wala silay nakita nga kini namakak.