ALANG sa kahigalaan, supporters ug fans ni Julian “Teban” Daan, mahimo pa siyang masud-ong sa iyang haya.

Kasamtangang gihaya sa St. Peter’s Funeral Homes sa may dalan Imus, sa dakbayan sa Sugbo si Teban.

Matod sa ikaduhang anak sa konsehal, Lester Daan, nga sa nasabutan nila, sa Lunes, Agusto 26, ihaya kinig usa ka gabii sa social hall sa Cebu Provincial Capitol isip pagyukbo nga nahimo kanhi nga provincial board member si Teban sa unang distrito.

Sa Agusto 27, ihaya na kini sa ilang panimay sa Barangay Tabunok, Siyudad sa Talisay ug sa Agusto 30 ilubong sa pribadong sam-ang sa Barangay Cansojong.

Apan sa di pa kini malubong, sa alas 8 sa buntag sa Agusto 30, ihapit una si Teban sa Talisay City hall paghatag og yukbo ug paghatag usab og kahigayunan sa mga kauban sa Talisay City hall.

Sa di pa ang alas 12 ihatod kini sa St. Joseph church sa Tabunok, alang sa requiem mass. (FMD)