Indian national nga tinun-an sa medisina sa usa ka unibersidad sa Barangay Banilad, dakbayan sa Sugbo giluwas sa kapulisan human nagsamadsamad sa kaugalingon sud sa usa ka convenience store.

Identity sa lalaking langyaw gitago. Siya kasamtangan nga nag-abang sa usa ka dormitory sa nahisgutang barangay.

Taho nga nakuha sa Cebu City Police Office (CCPO) nga niadtong Martes, Septiyembre 27, 2022 sa sayong buntag, nisulod sa convenience store ang maong tinun-an ug kalit lang nga nagwala pinaagi sa pagpunay og siyagit samtang nagdala og taas nga kutsilyo.

Ang mga trabahante sa maong tindahan, lakip na ang mga kustomer, naalibwag sa pagpanagan sa kahadlok nga i-hostage sila sa maong langyaw.

Apan lahi ang nahitabo kay ang iyang kaugalingon ang iyang gisamadsamaran.

Dali nga naabot ang mga sakop sa Mobile Patrol Unit (MPU) ug malampuson nga nailog ang dala niini nga hinagiban.

Matod ni Police Lieutenant Colonel Janette Rafter, deputy city director for operations sa CCPO, nga gidala sa tambalanan ang biktima aron maatiman ang mga samad.

Wala na usab moreklamo ang management sa tindahan human nasayod nga aduna kini gihambin nga depression ug nagpatagad lang sa iyang mga ginikanan nga atua sa India.