Subay sa no single use plastic ubos sa City Ordinance No. 2020-15 sa Dakbayan sa Naga, gisugdan na sa Siyudad ang Naga-Barter Shop.

Walo ka adlaw pa lang sukad sa pagmuntar sa shop, nakatigom na kun nakabaylo na moabot sa 1,116 ka kilos kun kapin sa usa ka tonelada sa mga plastic waste ang siyudad.

Ang shop mobaylo og butang sama sa plastic sando bags, polythelene (PET) bottles ug polypropylene (PP) nga plastic waste.

Apan kinahanglan nga limpyo ug uga nga mga plastic waste lang ang dawaton.

Matag tunga sa kilo o bisan og ¼ sa kilo nga plastic nga madala sa shop, bayloan kini og kupon nga mahimong ilisan og prutas, utanon o bugas nga nagkantidad sa P50 o tunga sa kilo.

Ang kupon pwede mailisan sa mga City Government-accredited nga tindahan sa Naga People’s Market.

Ang Naga-Barter Shop anaa nahimutang duol sa City of Naga Youth Holding Center ug Naga Police Station.

Abli kini matag Lunes hangtod Sabado, alas 8:00 sa buntag hangtod sa alas 5:00 sa hapon.

Gipasidan-an ang mga residente nga gusto mohatod sa mga plastic, kinahanglan magdala og household card.

Gipatuman sa Naga ang no single-use plastic kada adlaw subay sa tinguha sa pagpamenos sa basurang plastic.

Ang pag-ilis sa mga basura sa mga nag-unan panginahanglanon sa pamilya maoy pagdasig nga mahipos sa insaktong dapitang mga platik aron dili mobara sa mga kana o agianan sa tubig. / ANV