Nasikop sa mga sakop sa Police Station 5 sa Lapu-Lapu City Police Office( LCPO) ang usa ka construction worker nga giingong nag-wild ug nanunggab og upat niya ka mga kauban sa Sitio Ihawan, Brgy. Pusok, Dakbayan sa Lapu-Lapu pasado alas 10 sa gabii sa Marso 3, 2021.

Ang suspek giilang si John Michael Sanate Adorna, 33, taga Brgy. Gabi, Lungsod sa Cordova.

Si Adorna nidunggab gamit ang kutsilyo sa iyang mga kauban nga sila si Carlito Banticil Lampa, 33; Jonathan Go-od, 40; Ronaldo Pito Quiñones, 41, pulos mga lumolupyo sa Kalumboyan, Lungsod sa Sogod; ug Edmund Go-od Auman, 28, taga Tabunoc, Sogod.

Ang upat padulong na mangatulog sa bunkhouse sa ilang gitrabahong edipisyo sa City Veterinary Office dihang kalit nga gipangdunggab ni Adorna sa walay igong rason.

Nakaangkon ang mga biktima og samad dinunggaban sa nagkadaiyang bahin sa ilang lawas nga miresulta sa ilang pagkalandig sa Lapu-Lapu City District Hospital.

Matod ni Police Major Aibert Jay Samson,hepe sa Police Station 5, nga human sa insidente, nisuway unta og sibat si Adorna apan naabtan kini sa mga sakop sa Special Weapons and Tactics (SWAT) sa PUJ terminal sa Brgy Pajo nga padulong na untang mosibat paingon sa ilaha sa lungsod Cordova. (GCM)