DI NA tigumon ni Cebu City Mayor Edgardo Labella ang City Traffic Operations Management Board inay iyang umolon ang Traffic Management Coordinating Committee para sa paghatag og solusyon sa problema sa trapiko sa dakbayan sa Sugbo.

Pinaagi sa executive order nga pirmahan ni Labella, ang komitiba pangulohan ni Atty. Jerone Castillo isip chairman ug iyang sakop silang Konsehal Renato Osmeña Jr., Phillip Zafra, Dave Tumulak ug Antonio Cuenco, LTO 7 Regional Director Victor Caindec, LTFRB 7 Regional Director Eduardo Montealto, Fiscal Raul Cristoria, City Administrator Floro Casas Jr., City Attorney Rey Gealon ug public information officer Razel Cuizon.

Ilang ikauban ang private representante sa private sector nga silang kanhi konsehal Pastor Alcover Jr., Ernest Herrera II, Paul Gotiong, Nelson Yuvallos, Jerome Neri ug Architec Ed Samson. Ang mayor niingon nga di niya i-convene ang Citom Board sanglit gamay ra ang mga miyembro niini.

Buot niya nga daghan ang mga sakop para daghan ang magbinayloay sa ilang mga huna-huna labot sa pagsulbad sa problema sa trapiko. Si Labella niingon nga ang grupo ni Castillo moduso ngadto sa iyang buhatan og mga polisiya labot sa pagdumala sa trapiko ug unsay angay buhaton para paghatag og solusyon sa maong problema. (PAC)