Wa kalahos pagpangaligo og dagat ang 24 ka mga tawo human ang ilang gisakyan nga mini dumptruck nalimbuwad alas 11:45 sa buntag sa Dominggo, Pebrero 28, 2021 sa Transcentral Highway, Barangay Cansomoroy, Lungsod sa Balamban.

Sa maong disgrasya, naapil ang mga bata ug dunay upat nga nadala sa tambalanan.

Si Police Staff Sergeant Donald Pitogo, imbestigador sa Balamban Police Station nga nahinabi sa Superbalita Cebu, nagkanayon nga ang dumptruck gimaniho ni Archie Dionson, 35, ulitawo, taga Brgy. Pulangbato, Dakbayan sa Sugbo.

Ang tag-iya sa trak giilang si Ellen Leyson, taga Brgy. Pulangbato, kinsa naangol sab uban sa mga anak ug mga paryente. Matod ni Pitogo nga padulong ang grupo sa Lungsod sa Asturias, aron mangaligo og dagat.

Apan si Dionson nibutyag nga sa ilang pagbahada sa Transcentral Highway sa Sitio C sa Brgy. Cansomoroy, kalit lang wa na mokupot ang brake.

Iyang gimaniobra ang dumptruck aron dili mahagbong sa bung-aw.

Dihang nakita niya nga di na mapugngan, nahadlok siya nga malahos sa bung-aw, iyang gidasmagan ang railings.

Naharos ang railings hinungdan nga iyang gibangga sa kilid sa bukid ug nalimbuwad ang dumptruck.

Ang mga sakay nangalagpot samtang nangapiit ang mga bata. Mapasalamaton sila nga walay nakalas. “Basiyo naman ang brake unya nahadlok siya nga molahos sa unahan sa estraktura sa may DPWH kay lawom na kaayo sa unahan, iyaha nalang gibangga,” matod ni Pitogo.

Mga bata nga nangaangol nagpanuigon og 4 ngadto sa 17 anyos. Matod ni Pitogo, nga upat ang naa pa sa tambalanan, duha toa sa Balamban samtang ang laing duha naa sa tambalanan sa Dakbayan sa Sugbo.

Subling gipahimangnoan sa kapulisan ang mga motorista nga mag-amping kanunay sa ilang pag-agi sa Transcentral Highway kay daghan na ang nangadisgrasya sa dapit. (GPL)