TULIS maoy nag-unang motibo nga gisusi sa kapulisan sa pagpusil patay sa usa ka negusyante sud sa usa ka motel niadtong Biyernes sa gabii, Nobiyembre 6, 2020 sa sityo Laray, Barangay Pitogo, lungsod sa Consolacion.

Kini base sa mga kuha sa closed circuit television (CCTV) camera nga nagpakita nga ang kuyog nga babaye sa biktima ug gunman, nagkuyog sa pagsibat sakay sa usa ka motorsiklong gimameho sa laing babaye.

Si Rey Godinez Yuson, 39, minyo, taga Sitio Fatima, Barangay Jubay Liloan, negosyanteg sand and gravel, namatay diha-diha sa usa ka samad pinusilan sa tuo nga nawong.

Si Police Master Sergeant Achiles Bacorta, sa Consolacion Police Station nga nahinabi sa Superbalita Cebu, nagkanayon nga si Yuson nagsakay sa iyang Ford Ranger padulong na mo-parking sa motel kauban ang usa ka wala mailhing babaye.

Base sa kuha sa CCTV, mo-park na unta si Yuson dihang niabot ang riding in-tandem, babaye ug lalake. Ang lalake nga driver nikanaug sa motorsiklo samtang ang babayeng angkas nipuli pagmaneho.

“Buto-buto dayon. Ang roomboy mibutyag nga wala siya makita sa pagpusil. Pero pagsibat, ang babaye nga sakay sa biktima mikuyog, misakay sa motorsiklo,” dugang ni Gilleran.