GIBANA-BANA sa 100 gramos nga shabu ang nasakmit sa tulo ka nga gidudahang drug pusher sa duha ka managlahi nga operation sa dakbayan sa Sugbo,kagabii, Oktubre 20, 2019, ug karong kadlawaon, Oktubre 21.

Si Elemar Jose, 32 anyos,nga taga Sitio Silangan 1,Barangay Tinago ning siyudad, gironda sa mga sakop sa Waterfront Police Station sulod mismo sa iyahang balay kagabii.

Nasakmit gikan kang Jose ang kapin sa 5 gramos nga shabu gikan sa iyang possesion.

Gihulagway si Jose sa mga kapulisan nga usa sa mga bagsakan sa droga sa Sitio Silangan.

Samtang laing duha pa ang nadakpan sa pagpang ronda sa kapulisan sa San Nicolas Police Station nga miresulta sa pakdakop nila.

Si Reynaldo Daan, 30 anyos,alyas Nicole nga taga T.Cavan, Barangay Pasil, kinsa maoy target sa kapulisan ang nasikop atol sa pagpangronda.

Gawas ni Daan, nasikop sad ang sinaligan niini nga si Cyril Cartagenas.

Nasakmit sa duha ang moabot na sa 95 gramos nga shabu gikan sa ilang possesion.

Moabot na sa P700,000 ang balor sa nasakmit nga shabu sa tulo ka mga dinakpan.(Superbalita Cebu)