WALO na ka mga tawo ang nagpatang kang Cebu City Councilor Dave Tumulak gumikan sa giingong identity theft sa social media.

Usa ka 20-anyos nga dalaga ang labing uwahi nga niduol kang Tumulak aron mailhan kon si kinsa ang tag-iya sa account nga nagkuha sa iyang hulagway uban sa iyang uyab o nga gi-post sa social media.

Matod ni Roxane (dili tinuod nga pangalan), dunay Twitter account nga nigamit sa iyang picture ug nihulga pa kini nga mo-post og dugang mga hulagway ug video nga makadaot sa iyang pagkatawo.

Si Tumulak nagkanayon nga kini maoy ikawalo nga kaso sa gituohang identity theft sukad sa Oktubre 2020.

Ang konsehal nipadayag nga nakig-alayon na sila sa National Bureau of Investigation ( NBI) 7 para sa posibleng pag-ila sa mga account nga nigamit sa ilang mga hulagway.

Dugang sa konsehal nga ang NBI naglisod usab og ila niini sanglit fake accounts ang gipanggamit ug mokalit usab og deactivate ug dili na makit-an.

Si Tumulak niingon nga gilihok na karon sa mga eksperto labi na sa cybercrime group para mailhan ang tinuoray nga tawo kinsa nigamit og dili tinuod nga pangalan.

Iyang giawhag ang social media users sa pag-limit sa ilang mga impormasyon nga ibutang sa ilang account ug likayan ang pag-upload sa ilang mga litrato sulod sa ilang mga balay ug ilisan ang mga password matag buwan.

Ang konsehal niawhag sa mga gustong magbinuang sa dili pagdayon sa ilang laraw aron dili sila mag-atubang og kaso sa kauwahian. (PAC)