Si Cebu City Mayor Edgardo Labella nitugot na sa sektor sa turismo alang sa subling pagbukas karon nga ang siyudad naa sa mas lugak nga modified general community quarantine (MGCQ) hangtos sa tapos sa Septiyembre.

Ubos sa Executive Order No. 89 nga giluwatan ni Labella niadtong Agusto 31, 2020, ang mga industriya ubos sa Category IV gitugtan na karon sa pagbukas, naglakip sa tourist destinations; travel agencies, tour operators, reservation service, ug ubang mga kalihukang dunay kalambigitan niini; live events (ubos sa pagtugot sa Department of Tourism guidelines); full body massage; tattoo ug body piercing; language, driving, dance, acting, ug voice schools; ug libraries, archives, museums ug cultural centers.

Ang tourist destinations sa siyudad napugos sa pagpanirang temporaryo niadtong Marso tungod sa pagtumaw sa coronavirus pandemic.

Bisan ang pipila ka mga kalihukan nga nag-promote sa turismo ug kultura sa siyudad napugos sa pag-online sama sa Gabii sa Kabilin, usa ka tinuig nga kulturanhong kalihukan.

Matod ni Cebu City Tourism Commission chairman Jocelyn Pesquera nga ang pagbukas sa tourism sites sa siyudad usa ka maayong kalambuan.

Si Pesquera niingon nga ang kalambuan natukma kay ang Septiyembre buwan sa turismo.

Ang Tourism Commission molusad usab sa ilang Tourism Month sa Septiyembre 4.

Ning tuiga nga Tourism Month, ang commission nagtinguha sa paghimo sa tourism sector sa pagsagop sa new normal ug motabang sa ekonomiya sa turismo nga mabuhi og balik.

“To encourage all sectors and tourism stakeholders of Cebu City to adopt the ‘new normal,’ invent and create new initiatives to help the tourism economy back in shape,” matod sa tumong sa commission sa kasaulogan sa turismo karong tuiga.

Matod ni Cebu City Attorney Rey Gealon, tigpamaba sa mayor, nga kinahanglan ang management ug mga tag-iya sa tourist spots estriktong mopatuman sa mga health protocol.

Si Gealon niingon nga 50 porsyento sa kapasidad kinahanglan sundon aron maseguro nga dunay social distancing sa bisan unsa nga panagtapok.

Inilang tourist spots sa Cebu City mao ang Sirao Flower Garden sa Barangay Sirao, Tops Lookout sa Barangay Busay ug Fort San Pedro. (JJL)