Makasinati na ang taga isla sa Bantayan sa mas paspas ug kasaligan nga koneksiyon sa komunikasyon nunot sa pag-abot na sa isla sa fiber optic cable gikan gikan sa mainland sa Sugbo sa miaging semana.

Gihangop nila ni Santa Fe Mayor Ithamar Espinosa ug Bantayan Mayor Art Despi ang pag-abot sa fiber cable connection ug nagpasalamat sa unang integrated telco company sa nasod, ang PLDT, Inc.

“On behalf of the Local Government of Santa Fe, we would like to extend our gratitude to PLDT for making this happen. PLDT fiber will encourage more investors on the island. We hope that this will be the solution to the many challenges that we are facing,” matod ni Espinosa sa post sa website sa PLDT.

Ang cable landing ceremony gipahigayon sa Barangay Poblacion, lungsod sa Santa Fe sa isla sa Bantayan island nga gitambongan sa mga lokal nga opisyal, PLDT, Smart Communications, Inc. ug Fiberhome.

Gawas sa paglusad sa PLDT og fiber-to-the-home services ug pagpalambo sa LTE ug 5G mobile services sa Smart alang sa mga residente ug turista sa maong lugar, kining mga submarine cable link mopalig-on usab sa mga kasamtangang fiber link ug mopauswag sa kalig-on sa PLDT network sa tibuok nasod pinaagi sa paghatag og alternatibong mga rota sa data traffic.

Ang fiber cable dako matabang sa pagpalambo sa turismo sa isla tungod sa ilang bag-ong koneksiyon sa komunikasyon, sumala sa pamahayag sa PLDT.

Ang isla sa Bantayan nailang destinasyon sa turismo tungod sa iyang puting bas ug tin-aw nga kadagatan lakip sa ubang natural nga talan-awon.