ORMOC CITY, LEYTE - Miresulta sa pinusilay ug pagkamatay sa target sa drug buy bust operation sa kapulisan sa Ormoc City niadtong Martes, Nobiyembre 27.

Giila ang suspek nga si Paul Gratol, alyas Pongki, anaa sa hustong edad, taga Barangay Linao ning dakbayan.

Ang suspek gipanid-an sa mga sakop sa City Drug Enforcement Unit (CDEU) human nakadawat og report bahin sa ilegal nga kalihukan ni Gratol.

Human sa taud taud nga pagpaniid, napamatud-an kini sa kapulisan nga positibo.

Sa miaging adlaw, gilusad sa CDEU pinangulohan ni Sr. Inspector Franklin Parangan uban ni Sr. Inspector Richard Castañares, Capt. Jay Latosa sa Philippine Army ug Sr. Inspector Delo Gomez ang usa ka buy bust operation.

Usa ka poseur buyer ang mihimo pagpalit og shabu kang Gratol.

Nakabantay kini nga pulis ang katransaksyon hinungdan nga mibunot kini og una sa armas ug mipusil sa operatiba.

Matod sa kapulisan, isip pagdepensa sa kaugalingon, nibawos sila nga nakaigo kang Gratol.

Dali kining gidala sa tambalanan ug gideklarar ni Dr. Winston Villaflor nga patay na pag-abot.

Nakuha sa kapulisan gikan sa crime scene ang lima ka mga pakete sa gituhoang shabu, pipila ka basiyo sa bala ug pistola nga iya sa suspek.

Matod sa kapulisan, bisan og gideklara mga drug cleared ang Ormoc, wa kini magpasabot nga wa nay durugista sa usa ka lugar. JKP