GIPAABOT nga masinati na sa Central Visayas, ilabi na sa Sugbo ang hinay ngadto sa kasarangan ug usahay makusog nga pag-uwan, tungod sa Tropical Depression 'TD' Usman, sugod ugma sa hapon o gabii (Dec. 27).

Gitug-an ni Vhan Singson ang weather specialist sa Pagasa Mactan nga posible pa nga mokusog ang bagyong' Usman ngadto na sa Tropical storm human kini makahimo sa pag-landfall sa Eastern Visayas karong Byernes (Dec. 28).

Ang bagyo nga Usman, kinsa maoy katapusan nga bagyo nga nisulod sa nasud karong' tuiga, base sa latest weather bulletin alas 11 karong buntag (Dec. 26) anaa kini sa 795 east sa Hinatuan, Surigao del Sur, ug adunay gikusgong' hangin nga 55 kilometro matag oras ug paghaguros nga 65 kilometro matag takna ug naglihuk 10 kph northwest.

Gipaabot nga moagi ang mata sa bagyo sa kadagatan sa tungatunga sa Northern Cebu ug sa Masbate, karong Byernes o Sabado.

Hinungdan nga gipaabot ang mga pag-ulan ilabi na sa amihanang bahin sa Sugbo.

Ang publiko ug lokal nga kagamhanan ang gipahimangnuan sa posibleng masinati na usab nga pagbaha o pagdahili sa yuta tungod sa mga pag-ulan hangtud na karong' weekend. (Fe Marie Dumaboc)